ਦਾ ਐਡੀਟਰ ਨਿਊਜ. ਹੁਸ਼ਿਆਰਪੁਰ —- ਇੱਕ ਪਾਸੇ ਸ਼ਰਾਬ ਨੀਤੀ ਕਾਰਨ ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਜਿੱਥੇ ਈ.ਡੀ.ਵੱਲੋਂ ਗਿ੍ਰਫਤਾਰ ਕਰ ਲਏ ਗਏ ਹਨ ਉੱਥੇ ਹੀ ਦਿੱਲੀ ਸਮੇਤ ਪੰਜਾਬ ਵਿੱਚ ਸ਼ਰਾਬ ਕਿੰਗ ਵਜ੍ਹੋਂ ਜਾਣੇ ਜਾਂਦੇ ਦੀਪ ਮਲਹੋਤਰਾ ਨੂੰ ਦੁਆਬੇ ਦੇ ਖਿੱਤੇ ਦੇ ਸ਼ਰਾਬ ਕਾਰੋਬਾਰ ਵਿਚੋਂ ਬਾਹਰ ਧੱਕਣ ਵਾਲੇ ਦੋ ਨੰਬਰੀਆਂ ਵੱਲੋਂ ਇਸ ਸਬੰਧੀ ਕੀਤੀ ਗਈ ਸਾਜਿਸ਼ ਵੀ ਬੇਪਰਦ ਹੋਣ ਲੱਗ ਪਈ ਹੈ, ਪਿਛਲੇ ਸਾਲ ਜਲੰਧਰ ਤੇ ਹੁਸ਼ਿਆਰਪੁਰ ਦੇ ਸ਼ਰਾਬ ਸਰਕਲ ਪ੍ਰਾਪਤ ਕਰਨ ਵਾਲੀ ਦੀਪ ਮਲਹੋਤਰਾ ਦੀ ਕੰਪਨੀ ਨੇ ਸਾਲ 2024-25 ਲਈ ਹੁਸ਼ਿਆਰਪੁਰ ਸਰਕਲ ਲੈਣ ਲਈ ਪਰਚੀ ਨਹੀਂ ਪਾਈ, ਇਸ ਖੇਤਰ ਨਾਲ ਜੁੜੇ ਭਰੋਸੇਯੋਗ ਸੂਤਰਾਂ ਦੀ ਮੰਨੀਏ ਤਾਂ ਸਾਲ 2024 ਵਿੱਚ ਹੁਸ਼ਿਆਰਪੁਰ ਸਰਕਲ ਲੈਣ ਵਾਲੇ ਦੀਪ ਮਲਹੋਤਰਾ ਵੱਲੋਂ ਸਭ ਤੋਂ ਪਹਿਲਾ ਹੁਸ਼ਿਆਰਪੁਰ ਵਿੱਚ ਆਪਣਾ ਸੈੱਟਅੱਪ ਲਗਾਇਆ ਗਿਆ ਸੀ ਤੇ ਫਿਰ ਕਿਸੇ ਸਥਾਨਕ ਸ਼ਰਾਬ ਵਪਾਰੀ ਦੀ ਭਾਲ ਸ਼ੁਰੂ ਕੀਤੀ ਤਾਂ ਜੋ ਉਹ ਹੁਸ਼ਿਆਰਪੁਰ ਵਿੱਚ ਸ਼ਰਾਬ ਦੇ ਕਾਰੋਬਾਰ ਉੱਪਰ ਦੀਪ ਮਲਹੋਤਰਾ ਵੱਲੋਂ ਨਜ਼ਰ ਰੱਖ ਸਕੇ, ਇਸ ਭਾਲ ਦੌਰਾਨ ਹੁਸ਼ਿਆਰਪੁਰ ਦੇ ਸ਼ਰਾਬ ਕਾਰੋਬਾਰੀ ਬਾਬੂ ਨਰੇਸ਼ ਅਗਰਵਾਲ ਤੇ ਇੱਕ ਜਲੰਧਰ ਦੇ ਵਪਾਰੀ ਨੂੰ ਦੀਪ ਮਲਹੋਤਰਾ ਵੱਲੋਂ ਛੋਟੀ-ਛੋਟੀ ਭਾਈਵਾਲੀ ਨਾਲ ਆਪਣੇ ਕੰਮ ਵਿੱਚ ਦਾਖਿਲ ਕਰਵਾ ਲਿਆ ਗਿਆ ਤੇ ਇੱਥੇ ਭਾਈਵਾਲ ਚੁਣਨ ਦੇ ਮਾਮਲੇ ਵਿੱਚ ਹੀ ਦੀਪ ਮਲਹੋਤਰਾ ਵੱਡੀ ਗਲਤੀ ਕਰ ਗਏ। ਜਿਵੇਂ-ਜਿਵੇਂ ਸ਼ਰਾਬ ਦਾ ਕਾਰੋਬਾਰ ਮਹੀਨਾ ਦਰ ਮਹੀਨਾ ਅੱਗੇ ਵਧਿਆ ਤਿਵੇਂ-ਤਿਵੇਂ ਹੁਸ਼ਿਆਰਪੁਰ ਸਰਕਲ ਵਿੱਚ ਦੋ ਨੰਬਰੀਆਂ ਦੀ ਸ਼ਰਾਬ ਦੀ ਐਂਟਰੀ ਵੱਧਦੀ ਗਈ, ਨਜਾਇਜ ਸ਼ਰਾਬ ਫੜਨ ਵਾਲੀਆਂ ਜੋ ਰੇਡ ਪਾਰਟੀਆਂ ਹੁਸ਼ਿਆਰਪੁਰ ਤੇ ਜਲੰਧਰ ਦੇ ਭਾਈਵਾਲਾਂ ਨੇ ਦੀਪ ਮਲਹੋਤਰਾ ਲਈ ਰੱਖੀਆਂ ਸਨ ਉਹ ਵੀ ਕਥਿਤ ਤੌਰ ਉੱਪਰ ਦੋ ਨੰਬਰੀਆਂ ਨਾਲ ਗੰਢ-ਤੁੱਪ ਵਿੱਚ ਹੀ ਰਹੀਆਂ ਜਿਸ ਸਦਕੇ ਜਲੰਧਰ ਦੇ ਭੋਗਪੁਰ ਤੇ ਨਵਾਂਸ਼ਹਿਰ ਸਰਕਲਾਂ ਦੀ ਸ਼ਰਾਬ ਹੁਸ਼ਿਆਰਪੁਰ ਵਿੱਚ ਦੋ ਨੰਬਰੀਆਂ ਰਾਹੀਂ ਖੁੱਲ੍ਹੇ ਰੂਪ ਵਿੱਚ ਵੇਚੀ ਗਈ ਤੇ ਸਿੱਟੇ ਵਜ੍ਹੋਂ ਸਾਲ ਖਤਮ ਹੁੰਦਿਆ-ਹੁੰਦਿਆ ਦੀਪ ਮਲਹੋਤਰਾ ਨੂੰ ਹੁਸ਼ਿਆਰਪੁਰ ਸਰਕਲ ਵਿਚੋਂ ਕਰੋੜਾਂ ਰੁਪਏ ਦਾ ਘਾਟਾ ਪੈ ਗਿਆ। ਪਤਾ ਤਾਂ ਇਹ ਵੀ ਲੱਗਾ ਹੈ ਕਿ ਭੋਗਪੁਰ ਸਰਕਲ ਵਿੱਚ ਨਰੇਸ਼ ਅਗਰਵਾਲ ਦੇ ਪਰਿਵਾਰ ਤੇ ਨਵਾਸ਼ਹਿਰ ਸਰਕਲ ਵਿੱਚ ਜਲੰਧਰ ਦੇ ਦੂਜੇ ਭਾਈਵਾਲ ਦੀ ਹਿੱਸੇਦਾਰੀ ਰਹੀ ਹੈ।
ਭਾਈਵਾਲੀ ਦਾ ਲਾਰਾ, ਕਾਨੂੰਗੋ ਨੂੰ ਮਿਲਿਆ ਕੇਸ ’ਚ ਹੁਲਾਰਾ
ਸਾਲ 2023 ਦੌਰਾਨ ਜੁਲਾਈ-ਅਗਸਤ ਮਹੀਨੇ ਵਿੱਚ ਹੀ ਦੀਪ ਮਲਹੋਤਰਾ ਤੇ ਉਨ੍ਹਾਂ ਦੀ ਟੀਮ ਨੂੰ ਹੁਸ਼ਿਆਰਪੁਰ ਵਿੱਚ ਸਭ ਅੱਛਾ ਨਹੀਂ ਹੈ ਹੋਣ ਦਾ ਅਹਿਸਾਸ ਹੋ ਗਿਆ ਸੀ ਤੇ ਇਸੇ ਕਾਰਨ ਉਨ੍ਹਾਂ ਦੀ ਟੀਮ ਨੇ ਸਥਾਨਕ ਭਾਈਵਾਲ ਅਗਰਵਾਲ ਤੇ ਜਲੰਧਰ ਦੀ ਭਾਈਵਾਲ ਦੇ ਹੁਸ਼ਿਆਰਪੁਰ ’ਚ ਕਰਿੰਦੇ ਸੁਰਤਾਜ ਦੀ ਚੂੜੀ ਟਾਇਟ ਕਰਦਿਆ ਇਨ੍ਹਾਂ ਨੂੰ ਦੋ ਟੁੱਕ ਕਿਹਾ ਸੀ ਕਿ ਜਾਂ ਤਾਂ ਦੋ ਨੰਬਰ ਦੀ ਸ਼ਰਾਬ ਹੁਸ਼ਿਆਰਪੁਰ ਸਰਕਲ ਵਿੱਚ ਵਿਕਣ ਤੋਂ ਰੋਕੋ ਨਹੀਂ ਤਾਂ ਸਾਨੂੰ ਤਹਾਨੂੰ ਹੁਸ਼ਿਆਰਪੁਰ ਵਿੱਚ ਨਾਲ ਰੱਖਣ ਦਾ ਕੋਈ ਫਾਇਦਾ ਨਹੀਂ ਹੈ, ਸੂਤਰਾਂ ਮੁਤਾਬਿਕ ਦੀਪ ਦੇ ਗੁੱਸੇ ਨੂੰ ਸ਼ਾਂਤ ਕਰਨ ਲਈ ਅਗਰਵਾਲ ਤੇ ਸੁਰਤਾਜ ਦੀ ਜੋੜੀ ਨੇ ਹੁਸ਼ਿਆਰਪੁਰ ਸਬਜ਼ੀ ਮੰਡੀ ਦੇ ਇੱਕ ਵੱਡੇ ਵਪਾਰੀ ਰੋਹਿਤ ਕਾਨੂੰਗੋ ਉਰਫ ਕਾਲੂ ਨਾਲ ਸੰਪਰਕ ਕਰ ਉਸ ਨੂੰ ਹੁਸ਼ਿਆਰਪੁਰ ਸਰਕਲ ਵਿੱਚ ਭਾਈਵਾਲੀ ਦੀ ਆਫਰ ਦਿੱਤੀ ਜਿਸ ਪਿੱਛੋਂ ਦੱਸਿਆ ਜਾ ਰਿਹਾ ਕਿ ਅਗਸਤ ਮਹੀਨੇ ਰੋਹਿਤ ਕਾਨੂੰਗੋ ਉਰਫ ਕਾਲੂ ਨੇ ਦੋ ਨੰਬਰੀਆਂ ਨੂੰ ਰੋਕਣ ਲਈ ਆਪਣੀ ਇੱਕ ਨਵੀਂ ਰੇਡ ਪਾਰਟੀ ਖੜ੍ਹੀ ਕਰ ਦਿੱਤੀ ਜਿਸ ਨੇ ਮਹਿਜ 15-20 ਦਿਨਾਂ ਦੌਰਾਨ ਹੀ ਹੁਸ਼ਿਆਰਪੁਰ ਵਿੱਚ ਵੱਡੇ ਦੋ ਨੰਬਰੀਆਂ ਨੂੰ ਫੜ ਕੇ ਪੁਲਿਸ ਹਵਾਲੇ ਕਰ ਦਿੱਤਾ, ਇਸ ਪਿੱਛੋਂ ਦੀਪ ਮਲਹੋਤਰਾ ਦੀ ਆਮਦਨ ਵਿੱਚ ਲੱਖਾਂ ਰੁਪਏ ਦਾ ਵਾਧਾ ਕੁਝ ਦਿਨਾਂ ਵਿੱਚ ਹੀ ਹੋ ਗਿਆ ਜਿਸ ਪਿੱਛੋਂ ਕਾਲੂ ਨੂੰ ਧੰਦੇ ਵਿੱਚ ਲਿਆਉਣ ਵਾਲੀ ਜੋੜੀ ਨੂੰ ਆਪਣੀ ਫਿਕਰ ਪੈ ਗਈ ਕੇ ਜੇਕਰ ਕਾਲੂ ਇਸੇ ਤਰ੍ਹਾਂ ਕਾਮਯਾਬ ਰਿਹਾ ਤਾਂ ਭਵਿੱਖ ਵਿੱਚ ਦੀਪ ਮਲਹੋਤਰਾ ਉਨ੍ਹਾਂ ਨੂੰ ਮੂੰਹ ਨਹੀਂ ਲਗਾਵੇਗਾ, ਇਸ ਪਿੱਛੋਂ ਰੋਹਿਤ ਕਾਲੂ ਵੀ ਸਾਜਿਸ਼ ਦਾ ਸ਼ਿਕਾਰ ਬਣਾਇਆ ਗਿਆ, ਕੁਝ ਕਥਿਤ ਦੋ ਨੰਬਰੀਆਂ ਨੂੰ ਪਹਿਲਾਂ ਉਸਦੇ ਗਲ ਪਾਇਆ ਗਿਆ ਤੇ ਫਿਰ ਉਸ ਉੱਪਰ ਇੱਕ ਵੱਡਾ ਮਾਮਲਾ ਦਰਜ ਕਰਵਾ ਕੇ ਜੇਲ੍ਹ ਭੇਜ ਦਿੱਤਾ ਗਿਆ, ਇਸ ਤਰ੍ਹਾਂ ਦੀਪ ਦੀ ਆਮਦਨ ਵਧਾਉਣੀ ਕਾਲੂ ਨੂੰ ਹੀ ਮਹਿੰਗੀ ਪੈ ਗਈ ਤੇ ਬਾਅਦ ਵਿੱਚ ਜਦੋਂ ਰੋਹਿਤ ਕਾਲੂ ਕੁਝ ਦਿਨਾਂ ਬਾਅਦ ਜੇਲ੍ਹ ਵਿੱਚੋ ਬਾਹਰ ਆਇਆ ਤਾਂ ਉਸ ਦਾ ਨਾ ਤਾਂ ਅਗਰਵਾਲ ਨੇ ਹਾਲ ਜਾਣਿਆ ਤੇ ਨਾ ਸੁਰਤਾਜ ਨੇ।
ਰੇਡ ਪਾਰਟੀ ਵੀ ਆਪਣੀ ਤੇ ਦੋ ਨੰਬਰ ਦੀ ਸ਼ਰਾਬ ਵੀ ਆਪਣੀ, ਸਰਕਲ ਦੀਪ ਬਾਬੂ ਦਾ
ਜ਼ਿਲ੍ਹਾ ਐਕਸਾਈਜ਼ ਵਿਭਾਗ ਸਮੇਤ ਹੁਸ਼ਿਆਰਪੁਰ ਨਾਲ ਸਬੰਧਿਤ ਸ਼ਰਾਬ ਦੇ ਦੂਜੇ ਠੇਕੇਦਾਰਾਂ ਵਿੱਚ ਅੱਜਕੱਲ੍ਹ ਇਹ ਗੱਲ ਆਮ ਚਰਚਾ ਦਾ ਵਿਸ਼ਾ ਹੈ ਕਿ ਹੁਸ਼ਿਆਰਪੁਰ ਸਰਕਲ ਤਾਂ ਦੀਪ ਬਾਬੂ ਦਾ ਹੀ ਸੀ ਪਰ ਭਾਈਵਾਲ ਚੁਣਨ ਸਮੇਂ ਕੀਤੀ ਗਲਤੀ ਪਿੱਛੋਂ ਉਸ ਦੇ ਹੱਥ ਵਿੱਚ ਇੱਥੇ ਕੁਝ ਵੀ ਨਹੀਂ ਰਿਹਾ। ਚਰਚਾ ਤਾਂ ਇਹ ਵੀ ਹੈ ਕਿ ਹੁਸ਼ਿਆਰਪੁਰ ਵਿੱਚ ਜਿਹੜੀ ਰੇਡ ਪਾਰਟੀ ਪੂਰਾ ਸਾਲ ਕੰਮ ਕਰਦੀ ਰਹੀ ਉਸ ਦੀ ਸ਼ਹਿ ਨਾਲ ਹੀ ਇਸ ਸਰਕਲ ਵਿੱਚ ਦੋ ਨੰਬਰ ਦੀ ਸ਼ਰਾਬ ਧੜੱਲੇ ਨਾਲ ਵਿਕੀ। ਠੇਕੇਦਾਰ ਤਾਂ ਇਹ ਵੀ ਕਹਿੰਦੇ ਹਨ ਕਿ ਦੀਪ ਬਾਬੂ ਦੇ ਸਰਕਲ ਵਿੱਚ ਭੋਗਪੁਰ ਤੇ ਨਵੇਸ਼ਹਿਰ ਦੀ ਸ਼ਰਾਬ ਦੋ ਨੰਬਰੀਆਂ ਨੇ ਪੂਰਾ ਸਾਲ ਰੱਜ ਕੇ ਵੇਚੀ, ਜਿਸ ਨਾਲ ਦੋ ਨੰਬਰੀ ਤਾਂ ਰੱਜ ਗਏ ਲੇਕਿਨ ਇੱਕ ਵੱਡਾ ਵਪਾਰੀ ਹੁਸ਼ਿਆਰਪੁਰ ਵਿੱਚ ਪੈਸੇ ਲਗਾਉਣ ਤੋਂ ਪੈਰ ਪਿੱਛੇ ਖਿੱਚ ਗਿਆ।
ਲੋਕ ਸਭਾ ਚੋਣਾ ਉਪਰੰਤ ਹੋਵੇਗੀ ਚੂੜੀ ਟਾਇਟ
ਠੇਕੇਦਾਰਾਂ ਵਿੱਚ ਇਹ ਚਰਚਾ ਵੀ ਆਮ ਹੈ ਕਿ ਕਰੋੜਾਂ ਦਾ ਘਾਟਾ ਖਾ ਕੇ ਦੀਪ ਮਲਹੋਤਰਾ ਚੁੱਪ ਬੈਠਣ ਵਾਲਾ ਨਹੀਂ ਹੈ ਤੇ ਉਨ੍ਹਾਂ ਵੱਲੋਂ ਲੋਕ ਸਭਾ ਚੋਣਾਂ ਦਾ ਕੰਮ ਨਿਬੜਨ ਦੀ ਉਡੀਕ ਕੀਤੀ ਜਾ ਰਹੀ ਹੈ, ਪੰਜਾਬ ਤੇ ਦਿੱਲੀ ਦੀ ਆਮ ਆਦਮੀ ਪਾਰਟੀ ਸਰਕਾਰ ਨਾਲ ਦੀਪ ਮਲਹੋਤਰਾ ਦੀਆਂ ਨਜ਼ਦੀਕੀਆਂ ਪ੍ਰਤੀ ਸਭ ਜਾਣਦੇ ਹਨ, ਇਸ ਲਈ ਚਰਚਾ ਹੈ ਕਿ ਚੋਣਾਂ ਪਿੱਛੋਂ ਦੀਪ ਮਲਹੋਤਰਾ ਉਨ੍ਹਾਂ ਦੇ ਗਲ ਨੂੰ ਹੱਥ ਜ਼ਰੂਰ ਪਾਵੇਗਾ ਜਿਨ੍ਹਾਂ ਸਾਥੀ ਬਣ ਕੇ ਉਸਦੀ ਕਥਿਤ ਲੁੱਟ ਕੀਤੀ।