ਦਾ ਐਡੀਟਰ ਨਿਊਜ. ਚੰਡੀਗੜ੍ਹ — ਆਮ ਆਦਮੀ ਪਾਰਟੀ ਦੀ ਸਰਕਾਰ ਵੱਲੋਂ ਬਣਾਈ ਗਈ ਐਕਸਾਈਜ਼ ਪਾਲਿਸੀ ਤੇ ਨਜਾਇਜ਼ ਸ਼ਰਾਬ ਦੇ ਧੰਦੇ ਵਿੱਚ ਸਰਗਰਮ ਦੋ ਨੰਬਰੀਆਂ ਦੇ ਚੱਲਦਿਆ ਸ਼ਰਾਬ ਦੇ ਵੱਡੇ ਕਾਰੋਬਾਰੀ ਤੌਬਾ ਕਰਨ ਲੱਗੇ ਹਨ ਤੇ ਪੰਜਾਬ ਦੇ ਸ਼ਰਾਬ ਕਿੰਗ ਮੰਨੇ ਜਾਂਦੇ ਦੀਪ ਮਲਹੋਤਰਾ ਤਾਂ ਇਸ ਵਾਰ ਦੁਆਬੇ ਨੂੰ ਅਲਵਿਦਾ ਹੀ ਆਖ ਗਏ ਹਨ ਤੇ ਉਨ੍ਹਾਂ ਨੇ ਦੁਆਬੇ ਦੇ ਕਿਸੇ ਸਰਕਲ ਵਿੱਚ ਕੋਈ ਪਰਚੀ ਨਹੀਂ ਪਾਈ, ਜਦੋਂ ਕਿ ਇਸ ਤੋਂ ਪਹਿਲਾ ਦੁਆਬੇ ਦੇ ਅਹਿਮ ਜ਼ਿਲ੍ਹੇ ਹੁਸ਼ਿਆਰਪੁਰ ਤੇ ਜਲੰਧਰ ਦੇ ਸ਼ਰਾਬ ਦੇ ਕੁੱਲ ਕਾਰੋਬਾਰ ਵਿੱਚੋਂ 60 ਫੀਸਦੀ ਤੋਂ ਜ਼ਿਆਦਾ ਹਿੱਸਾ ਉਨ੍ਹਾਂ ਦੇ ਕੋਲ ਸੀ, ਅਜਿਹਾ ਕਦਮ ਉਨ੍ਹਾਂ ਨੇ ਸ਼ਰਾਬ ਦੀ ਕਾਲਾ ਬਜ਼ਾਰੀ ਕਰਕੇ ਪੁੱਟਿਆ ਹੈ ਤੇ ਦੂਸਰਾ ਹੁਸ਼ਿਆਰਪੁਰ ਵਿੱਚ ਉਨ੍ਹਾਂ ਦੇ ਕਾਰੋਬਾਰੀ ਹਿੱਸੇਦਾਰ ਅਗਰਵਾਲ ਹੀ ਉਨ੍ਹਾਂ ਨੂੰ ਚੂਨਾ ਲਗਾ ਗਏ ਦੱਸੇ ਜਾ ਰਹੇ ਹਨ ਤੇੇ ਹੁਣ ਪੈਸੇ ਦੇ ਹਿਸਾਬ-ਕਿਤਾਬ ਨੂੰ ਲੈ ਕੇ ਦੋਵੇਂ ਧਿਰਾਂ ਵਿੱਚ ਖੜਕ ਗਈ ਹੈ, ਸੂਤਰਾਂ ਤੋਂ ਮਿਲੀ ਜਾਣਕਾਰੀ ਅਨੁਸਾਰ ਦੀਪ ਮਲਹੋਤਰੇ ਨੂੰ ਹੁਸ਼ਿਆਰਪੁਰ ਤੋਂ ਹੀ 16 ਕਰੋੜ ਰੁਪਏ ਦਾ ਘਾਟਾ ਪਿਆ ਹੈ ਅਤੇ ਦੱਸਿਆ ਜਾ ਰਿਹਾ ਹੈ ਕਿ ਇਹ ਸਾਰੇ ਘਾਟੇ ਦਾ ਠੀਕਰਾ ਨਰੇਸ਼ ਅਗਰਵਾਲ ਦੇ ਸਿਰ ਭੰਨਿਆ ਗਿਆ ਅਤੇ ਉਹਨਾਂ ਨੇ ਪਿਛਲੇ ਦਿਨੀ ਇਸ ਚਾਲੂ ਵਿੱਤੀ ਸਾਲ ਦੇ ਵਿੱਚ ਆਪਣਾ ਸਾਰਾ ਬਿਜਨਸ ਨਰੇਸ਼ ਅਗਰਵਾਲ ਤੋਂ ਵੱਖ ਕਰ ਲਿਆ ਸੀ ਇੱਥੇ ਇਹ ਵੀ ਗੱਲ ਜ਼ਿਕਰਯੋਗ ਹੈ ਕਿ ਪਿਛਲੇ ਸਮੇਂ ਦੌਰਾਨ ਜਿਸ ਕਿਸੇ ਨੇ ਵੀ ਨਰੇਸ਼ ਅਗਰਵਾਲ ਨਾਲ ਸ਼ਰਾਬ ਦੇ ਕਾਰੋਬਾਰ ਵਿੱਚ ਸਾਂਝੇਦਾਰੀ ਕੀਤੀ ਹੈ ਉਸ ਨੂੰ ਘਾਟਾ ਹੀ ਸਹਿਣਾ ਪਿਆ ਹੈ ਅਤੇ ਉਹਨਾਂ ਨੇ ਮੁੜ ਕੇ ਨਰੇਸ਼ ਅਗਰਵਾਲ ਨਾਲ ਕਦੇ ਵੀ ਸਾਂਝੇਦਾਰੀ ਨਹੀਂ ਰੱਖੀ।
ਇੱਥੇ ਇਹ ਗੱਲ ਜਿਕਰਯੋਗ ਹੈ ਕਿ ਸਰਕਾਰ ਦੀ ਪਾਲਿਸੀ ਦੇ ਚੱਲਦਿਆ ਸ਼ਰਾਬ ਦੇ ਕੋਟੇ ਦੀ ਕੋਈ ਵੀ ਲਿਮਟ ਨਾ ਹੋਣ ਕਰਕੇ ਹੁਸ਼ਿਆਰਪੁਰ ਦੇ ਦੋ-ਤਿੰਨ ਵੱਡੇ ਕਾਲਾ ਬਜ਼ਾਰੀਆਂ ਨੇ ਦੀਪ ਮਲਹੋਤਰੇ ਵਰਗਿਆਂ ਨੂੰ ਹੁਸ਼ਿਆਰਪੁਰ ਛੱਡਣ ਲਈ ਮਜ਼ਬੂਰ ਕਰ ਦਿੱਤਾ ਹੈ। ਜਿਸ ਹੁਸ਼ਿਆਰਪੁਰ ਸਰਕਲ ਨੂੰ ਪਿਛਲੇ ਸਾਲ ਦੀਪ ਮਲਹੋਤਰਾ ਤੇ ਸਾਥੀਆਂ ਨੇ ਚਾਈ-ਚਾਈ ਲਿਆ ਸੀ ਉਸ ਲਈ ਆਉਣ ਵਾਲੇ ਸੀਜਨ ਲਈ ਪਰਚੀ ਵੀ ਨਹੀਂ ਪਾਈ ਗਈ, ਜ਼ਿਲ੍ਹਾ ਐਕਸਾਈਜ ਵਿਭਾਗ ਵੱਲੋਂ 13 ਮਾਰਚ ਤੋਂ ਲੈ ਕੇ 17 ਮਾਰਚ ਤੱਕ ਸ਼ਰਾਬ ਠੇਕੇਦਾਰਾਂ ਦੀਆਂ ਪਰਚੀਆਂ ਪ੍ਰਾਪਤ ਕੀਤੀਆਂ ਗਈਆਂ ਹਨ ਤੇ ਹੁਸ਼ਿਆਰਪੁਰ ਸਰਕਲ ਜ਼ਿਲ੍ਹੇ ਦਾ ਅਜਿਹਾ ਸਰਕਲ ਸਾਬਿਤ ਹੋਇਆ ਜਿਸ ਨੂੰ ਪ੍ਰਾਪਤ ਕਰਨ ਲਈ ਮਹਿਜ 6 ਪਰਚੀਆਂ ਪਾਈਆਂ ਗਈਆਂ ਤੇ ਦੱਸਿਆ ਤਾਂ ਇਹ ਵੀ ਜਾ ਰਿਹਾ ਕਿ ਜੋ 6 ਪਰਚੀਆਂ ਪਾਈਆਂ ਗਈਆਂ ਹਨ ਉਹ ਵੀ ਐਕਸਾਈਜ਼ ਵਿਭਾਗ ਵੱਲੋਂ ਕੁਝ ਠੇਕੇਦਾਰਾਂ ਨੂੰ ਵਾਰ-ਵਾਰ ਕਹਿ ਕੇ ਪੁਆਈਆਂ ਗਈਆਂ ਹਨ। ਦੂਜੇ ਪਾਸੇ ਜ਼ਿਲ੍ਹਾ ਐਕਸਾਈਜ਼ ਵਿਭਾਗ ਨੇ ਪਰਚੀਆਂ ਦਾ ਡਰਾਅ ਕੱਢਣ ਦੀ ਪਹਿਲਾ ਤੈਅ ਕੀਤੀ 22 ਮਾਰਚ ਨੂੰ ਮੁਲਤਵੀ ਕਰ ਦਿੱਤਾ ਹੈ ਜਿਸ ਤੋਂ ਸਾਫ ਹੈ ਕਿ ਕੁਝ ਨਾ ਕੁਝ ਗੜਬੜ ਜ਼ਰੂਰ ਹੋਈ ਹੈ।
ਦੋ ਨੰਬਰੀਆਂ ਨੇ ਸ਼ਰਾਬ ਕਿੰਗ ਰੁਆ ਦਿੱਤਾ
ਪੰਜਾਬ ਵਿੱਚ ਸ਼ਰਾਬ ਕਿੰਗ ਵਜ੍ਹੋਂ ਜਾਣੇ ਜਾਂਦੇ ਦੀਪ ਮਲਹੋਤਰਾ ਦੀ ਸਰਕਾਰੇ-ਦਰਬਾਰੇ ਪਹੁੰਚ ਤੋਂ ਕੋਈ ਅਨਜਾਣ ਨਹੀਂ ਹੈ ਲੇਕਿਨ ਲੰਘੇ ਸਾਲ ਹੁਸ਼ਿਆਰਪੁਰ ਸਰਕਲ ਪ੍ਰਾਪਤ ਕਰਨ ਵਾਲੇ ਇਸ ਸ਼ਰਾਬ ਕਿੰਗ ਨੂੰ ਹੁਸ਼ਿਆਰਪੁਰ ਦੇ ਦੋ ਨੰਬਰੀਆਂ ਨੇ ਨਜਾਇਜ਼ ਸ਼ਰਾਬ ਵੇਚ-ਵੇਚ ਇੱਕ ਤਰ੍ਹਾਂ ਰੁਆ ਦਿੱਤਾ ਹੈ, ਜਾਣਕਾਰੀ ਮੁਤਾਬਿਕ ਹੁਸ਼ਿਆਰਪੁਰ ਸ਼ਹਿਰ ਵਿੱਚ ਲੰਘੇ ਸਾਲ ਦੌਰਾਨ ਧੜੱਲੇ ਨਾਲ ਦੋ ਨੰਬਰੀਆਂ ਨੇ ਨਜਾਇਜ਼ ਸ਼ਰਾਬ ਵੇਚੀ ਜਿਸਦਾ ਸਿੱਟਾ ਇਹ ਨਿਕਲਿਆ ਕਿ ਸਰਕਲ ਲੈਣ ਵਾਲੇ ਦੀਪ ਮਲਹੋਤਰਾ ਦੀ ਕੰਪਨੀ ਨੂੰ ਇੱਥੇ ਵੱਡਾ ਆਰਥਿਕ ਨੁਕਸਾਨ ਹੋਇਆ।
ਕੋਟਾ ਨਿਰਧਾਰਿਤ ਨਾ ਹੋਣਾ ਦੋ ਨੰਬਰੀਆਂ ਲਈ ਵਰਦਾਨ
ਆਪ ਸਰਕਾਰ ਵੱਲੋਂ ਐਕਸਾਈਜ਼ ਪਾਲਿਸੀ ਵਿੱਚ ਠੇਕੇਦਾਰਾਂ ਲਈ ਪਹਿਲਾ ਤੈਅ ਕੀਤੀ ਜਾਣ ਵਾਲੀ ਸ਼ਰਾਬ ਦੇ ਕੋਟੇ ਦੀ ਸ਼ਰਤ ਨੂੰ ਹਟਾ ਦੇਣਾ ਦੋ ਨੰਬਰੀਆਂ ਲਈ ਵਰਦਾਨ ਸਾਬਿਤ ਹੋਇਆ, ਪਿਛਲੇ ਸਾਲ ਦੌਰਾਨ ਸ਼ਰਾਬ ਠੇਕੇਦਾਰਾਂ ਵੱਲੋਂ ਵੱਡੀ ਮਾਤਰਾ ਵਿੱਚ ਸ਼ਰਾਬ ਕੰਪਨੀਆਂ ਤੋਂ ਸਸਤੇ ਭਾਅ ਸ਼ਰਾਬ ਖਰੀਦੀ ਗਈ ਤੇ ਅੱਗੇ ਇਸਦਾ ਕੁਝ ਹਿੱਸਾ ਤਾਂ ਆਪਣੇ ਠੇਕਿਆਂ ਤੇ ਵੇਚਿਆ ਤੇ ਵਾਧੂ ਸ਼ਰਾਬ ਦੋ ਨੰਬਰੀਆਂ ਨੂੰ ਵੇਚੀ ਗਈ ਤੇ ਅੱਗੇ ਦੋ ਨੰਬਰੀ ਵੱਖ-ਵੱਖ ਸਰਕਲਾਂ ਵਿੱਚ ਇਸ ਸ਼ਰਾਬ ਨੂੰ ਵੇਚੀ ਗਈ ਜਿਸ ਨਾਲ ਉਨ੍ਹਾਂ ਠੇਕੇਦਾਰਾਂ ਦਾ ਨੁਕਸਾਨ ਹੋਇਆ ਜਿਨ੍ਹਾਂ ਦੇ ਸਰਕਲਾਂ ਵਿੱਚ ਦੋ ਨੰਬਰ ਦੀ ਸ਼ਰਾਬ ਵੇਚੀ ਗਈ।
ਹੁਸ਼ਿਆਰਪੁਰ ਤੋਂ ਹਿਮਾਚਲ ਨੂੰ ਸ਼ਰਾਬ ਸਪਲਾਈ
ਦੋ ਨੰਬਰੀਆਂ ਨੇ ਜਿੱਥੇ ਹੁਸ਼ਿਆਰਪੁਰ ਵਿੱਚ ਸ਼ਰਾਬ ਵੇਚੀ ਉੱਥੇ ਹੀ ਕੰਢੀ ਖੇਤਰ ਦੇ ਨਾਲ ਲੱਗਦੇ ਹਿਮਾਚਲ ਪ੍ਰਦੇਸ਼ ਵਿੱਚ ਵੀ ਇਨ੍ਹਾਂ ਵੱਲੋਂ ਵੱਡੀ ਮਾਤਰਾ ਵਿੱਚ ਨਜਾਇਜ਼ ਸ਼ਰਾਬ ਪਹੁੰਚਾਈ ਗਈ, ਦੋ ਨੰਬਰੀਆਂ ਵੱਲੋਂ ਜੋ ਸਪਲਾਈ ਹਿਮਾਚਲ ਵਿੱਚ ਦਿੱਤੀ ਗਈ ਉਹ ਉੱਥੇ ਦੇ ਸ਼ਰਾਬ ਮਾਫੀਆ ਨੇ ਹੱਸ ਕੇ ਜਜਬ ਕਰ ਲਈ ਕਿਉਂਕਿ ਉਨ੍ਹਾਂ ਨੂੰ ਹਿਮਾਚਲ ਦੇ ਮੁਕਾਬਲੇ ਪੰਜਾਬ ਦੀ ਸ਼ਰਾਬ ਸਸਤੇ ਭਾਅ ਮਿਲਦੀ ਰਹੀ ਜਿਸ ਨਾਲ ਉਨ੍ਹਾਂ ਦਾ ਮੁਨਾਫਾ ਵੱਧਦਾ ਗਿਆ।
ਹੁਸ਼ਿਆਰਪੁਰ ਸਰਕਲ ਘਾਟੇ ਵਿੱਚ ਰਿਹਾ-ਐਕਸਾਈਜ਼ ਵਿਭਾਗ
ਜਿਲ੍ਹਾ ਐਕਸਾਈਜ਼ ਵਿਭਾਗ ਵਿੱਚ ਤੈਨਾਤ ਈ.ਟੀ.ਓ.ਸੁਖਵਿੰਦਰ ਸਿੰਘ ਨਾਲ ਜਦੋਂ ਹੁਸ਼ਿਆਰਪੁਰ ਸਰਕਲ ਪ੍ਰਤੀ ਠੇਕੇਦਾਰਾਂ ਵੱਲੋਂ ਉਤਸ਼ਾਹ ਨਾ ਦਿਖਾਉਣ ਪ੍ਰਤੀ ਗੱਲ ਕੀਤੀ ਗਈ ਤਾਂ ਉਨ੍ਹਾਂ ਮੰਨਿਆ ਕਿ ਪਿਛਲੇ ਸੀਜਨ ਵਿੱਚ ਹੁਸ਼ਿਆਰਪੁਰ ਸਰਕਲ ਘਾਟੇ ਵਿੱਚ ਰਿਹਾ ਹੈ ਇਸੇ ਕਾਰਨ ਘੱਟ ਠੇਕੇਦਾਰਾਂ ਨੇ ਪਰਚੀ ਪਾਈ ਹੈ।
ਨਿਰਪੱਖ ਜਾਂੰਚ ਦੀ ਸਖਤ ਜਰੂਰਤ
ਪਿਛਲੇ ਸਮੇਂ ਦੌਰਾਨ ਘਟੀਆ ਸ਼ਰਾਬ ਪੀਣ ਨਾਲ ਕਈ ਲੋਕਾਂ ਦੀ ਮੌਤ ਹੋਈ ਹੈ ਤੇ ਇਹ ਘਟੀਆ ਸ਼ਰਾਬ ਵੇਚਣ ਦਾ ਧੰਦਾ ਕਰਨ ਵਾਲੇ ਦੋ ਨੰਬਰੀਆਂ ’ਤੇ ਪੰਜਾਬ ਸਰਕਾਰ ਨੂੰ ਸ਼ਿਕੰਜਾ ਕੱਸਣ ਦੀ ਲੋੜ ਹੈ, ਸਰਕਾਰ ਜੇਕਰ ਪਾਰਦਰਸ਼ੀ ਜਾਂਚ ਕਰਵਾਏ ਤਾਂ ਦੁੱਧ ਦਾ ਦੁੱਧ ਤੇ ਪਾਣੀ ਦਾ ਪਾਣੀ ਸਾਹਮਣੇ ਆ ਜਾਵੇਗਾ, ਪਿਛਲੇ ਸੀਜਨ ਦੌਰਾਨ ਕਿਸ ਠੇਕੇਦਾਰ ਨੇ ਉਸਦੇ ਸਰਕਲ ਦੀ ਮੰਗ ਤੋਂ ਵੱਧ ਸ਼ਰਾਬ ਕੰਪਨੀਆਂ ਤੋਂ ਖਰੀਦ ਕੇ ਵੇਚੀ ਇਸਦਾ ਪੂਰਾ ਚਿੱਠਾ ਐਕਸਾਈਜ ਵਿਭਾਗ ਕੋਲ ਮੌਜੂਦ ਰਹਿੰਦਾ ਹੈ ਲੇਕਿਨ ਲੋੜ ਹੈ ਨੇਕ ਨੀਤੀ ਨਾਲ ਕਾਰਵਾਈ ਕਰਨ ਦੀ।
ਇਸ ਸੰਬੰਧੀ ਦੀਪ ਮਲਹੋਤਰਾ ਅਤੇ ਨਰੇਸ਼ ਅਗਰਵਾਲ ਨਾਲ ਸੰਪਰਕ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ ਪਰ ਦੋਵਾਂ ਨੇ ਹੀ ਫੋਨ ਨਹੀਂ ਚੱਕਿਆ।