ਗੁਰੀ ਚਾਹਲ ਕੇਸ: ਰੇਪ ਤੋਂ ਡਰੱਗ ਨੈੱਟਵਰਕ ਵੱਲ ਨੂੰ ਚੱਲੀ ਹਵਾ !ਕਈ ਆਈਪੀਐਸ ਅਤੇ ਪੀਪੀਐਸ ਵੀ ਸ਼ਾਮਿਲ

ਚੰਡੀਗੜ੍ਹ। ਗੁਰੀ ਚਾਹਲ ਮਾਮਲਾ ਜਿੰਨਾ ਹੁਣ ਤੱਕ ਜਿਨਸੀ ਸ਼ੋਸ਼ਣ ਅਤੇ ਲੜਕੀਆਂ ਨਾਲ ਸਬੰਧਾਂ ਦੇ  ਦੋਸ਼ਾਂ ਤੱਕ ਸੀਮਤ ਮੰਨਿਆ ਜਾ ਰਿਹਾ ਸੀ, ਉਸ ਤੋਂ ਕਿਤੇ ਵੱਡਾ ਹੋਣ ਦੇ ਦਾਅਵੇ ਹੁਣ ਸਾਹਮਣੇ ਆ ਰਹੇ ਹਨ। ਭਰੋਸੇਯੋਗ ਦੱਸੇ ਜਾ ਰਹੇ ਸੂਤਰਾਂ ਮੁਤਾਬਕ ਇਸ ਮਾਮਸ਼ਾਮਿਲ ਲੇ ਦੇ ਤਾਰ ਕਥਿਤ ਤੌਰ ’ਤੇ ਇੱਕ ਅੰਤਰਰਾਸ਼ਟਰੀ ਡਰੱਗ ਨੈੱਟਵਰਕ ਨਾਲ ਜੁੜੇ ਹੋ ਸਕਦੇ ਹਨ। ਦਾਅਵਾ ਤਾਂ ਇੱਥੋਂ ਤੱਕ ਕੀਤਾ ਜਾ ਰਿਹਾ ਹੈ ਕਿ ਇਸ ਨੈੱਟਵਰਕ ਨਾਲ ਜੁੜੇ ਕਰੀਬ 50 ਤੋਂ 55 ਲੜਕੇ-ਲੜਕੀਆਂ ਅਮਰੀਕਾ ਸਮੇਤ ਵੱਖ-ਵੱਖ ਦੇਸ਼ਾਂ ਵਿੱਚ ਕਾਨੂੰਨੀ ਕਾਰਵਾਈ ਦਾ ਸਾਹਮਣਾ ਕਰ ਰਹੇ ਹਨ। ਹਾਲਾਂਕਿ ਇਨ੍ਹਾਂ ਦਾਅਵਿਆਂ ਦੀ ਅਜੇ ਤੱਕ ਕਿਸੇ ਜਾਂਚ ਏਜੰਸੀ ਵੱਲੋਂ ਅਧਿਕਾਰਤ ਪੁਸ਼ਟੀ ਨਹੀਂ ਕੀਤੀ ਗਈ ਹੈ।
ਸੂਤਰਾਂ ਦੀ ਮੰਨੀਏ ਤਾਂ ਕਥਿਤ ਨੈੱਟਵਰਕ ਵਿੱਚ ਨੌਜਵਾਨ ਲੜਕੀਆਂ ਨੂੰ ਪਹਿਲਾਂ ਪਿਆਰ ਜਾਂ ਵਿਆਹ ਦਾ ਭਰੋਸਾ ਦੇ ਕੇ ਸੰਪਰਕ ਵਿੱਚ ਲਿਆਂਦਾ ਜਾਂਦਾ ਸੀ। ਇਸ ਤੋਂ ਬਾਅਦ ਉਨ੍ਹਾਂ ਨੂੰ ਦੁਬਈ ਲਿਜਾਣ ਦੀ ਯੋਜਨਾ ਬਣਾਈ ਜਾਂਦੀ। ਦਾਅਵਾ ਹੈ ਕਿ ਲੜਕੀ ਨੂੰ ਇਹ ਕਿਹਾ ਜਾਂਦਾ ਕਿ ਦੋਵੇਂ ਇਕੱਠੇ ਵਿਦੇਸ਼ ਜਾ ਰਹੇ ਹਨ, ਪਰ ਆਖਰੀ ਸਮੇਂ ’ਤੇ ਮੁੰਡੇ ਵੱਲੋਂ ਕਿਸੇ ਕੰਮ ਦਾ ਹਵਾਲਾ ਦੇ ਕੇ ਆਪਣੀ ਯਾਤਰਾ ਰੱਦ ਕਰ ਦਿੱਤੀ ਜਾਂਦੀ ਅਤੇ ਲੜਕੀ ਨੂੰ ਇਕੱਲੇ ਭੇਜ ਦਿੱਤਾ ਜਾਂਦਾ।
ਸੂਤਰਾਂ ਅਨੁਸਾਰ ਦੁਬਈ ਪਹੁੰਚਣ ਤੋਂ ਬਾਅਦ ਕਥਿਤ ਤੌਰ ’ਤੇ ਕੁਝ ਵਿਅਕਤੀ ਏਅਰਪੋਰਟ ਤੋਂ ਲੜਕੀ ਨੂੰ ਆਪਣੇ ਕਬਜ਼ੇ ਵਿੱਚ ਲੈ ਕੇ ਹੋਟਲ ਤੱਕ ਲੈ ਜਾਂਦੇ ਸਨ। ਇਸ ਤੋਂ ਬਾਅਦ ਕਥਿਤ ਤੌਰ ’ਤੇ ਡਰੱਗ ਸਮੇਤ ਹੋਰ ਦੇਸ਼ਾਂ ਵਿੱਚ ਭੇਜਣ ਦੀ ਯੋਜਨਾ ਬਣਾਈ ਜਾਂਦੀ। ਸਭ ਤੋਂ ਗੰਭੀਰ ਦਾਅਵਾ ਇਹ ਹੈ ਕਿ ਕੁਝ ਲੜਕੀਆਂ ਨੂੰ ਇਹ ਪਤਾ ਹੀ ਨਹੀਂ ਹੁੰਦਾ ਸੀ ਕਿ ਉਨ੍ਹਾਂ ਦੇ ਸਮਾਨ ਵਿੱਚ ਨਸ਼ੀਲਾ ਪਦਾਰਥ ਮੌਜੂਦ ਹੈ। ਇਸ ਪੂਰੇ ਦਾਅਵੇ ਦੀ ਜਾਂਚ ਲਈ ਅੰਤਰਰਾਸ਼ਟਰੀ ਏਜੰਸੀਆਂ ਦੇ ਰਿਕਾਰਡ ਅਤੇ ਕੇਸਾਂ ਦੀ ਜਾਂਚ ਮਹੱਤਵਪੂਰਨ ਹੋ ਸਕਦੀ ਹੈ।

ਅੰਮ੍ਰਿਤਸਰ ਦੀ ਲੜਕੀ ਦਾ ਮਾਮਲਾ ਬਣ ਸਕਦਾ ਹੈ ਅਹਿਮ ਕੜੀ
ਗੁਰੀ ਚਾਹਲ ਖ਼ਿਲਾਫ਼ ਅੰਮ੍ਰਿਤਸਰ ਦੀ ਇੱਕ ਲੜਕੀ ਵੱਲੋਂ ਪਹਿਲਾਂ ਗੰਭੀਰ ਦੋਸ਼ ਲਗਾਏ ਜਾਣ ਦੀ ਗੱਲ ਸਾਹਮਣੇ ਆ ਚੁੱਕੀ ਹੈ। ਸੂਤਰਾਂ ਦਾ ਦਾਅਵਾ ਹੈ ਕਿ ਇਹ ਲੜਕੀ ਵੀ ਪਹਿਲਾਂ ਚਾਹਲ ਦੇ ਸੰਪਰਕ ਵਿੱਚ ਆਈ ਅਤੇ ਬਾਅਦ ਵਿੱਚ ਦੁਬਈ ਭੇਜੀ ਗਈ। ਉੱਥੇ ਉਸ ਨੂੰ ਏਅਰਪੋਰਟ ਤੋਂ ਲੈਣ ਲਈ ਕੁਝ ਵਿਅਕਤੀਆਂ ਦੇ ਪਹੁੰਚਣ ਦੀ ਗੱਲ ਵੀ ਕਹੀ ਜਾ ਰਹੀ ਹੈ।
ਪਰਿਵਾਰ ਵੱਲੋਂ ਦਖਲ ਤੋਂ ਬਾਅਦ ਲੜਕੀ ਨੂੰ ਵਾਪਸ ਭਾਰਤ ਲਿਆਂਦਾ ਗਿਆ। ਇਸ ਤੋਂ ਬਾਅਦ ਕਥਿਤ ਤੌਰ ’ਤੇ ਸਮਝੌਤੇ ਲਈ ਦਬਾਅ, ਧਮਕੀਆਂ ਅਤੇ ਵੱਡੀ ਰਕਮ ਦੀ ਪੇਸ਼ਕਸ਼ ਕੀਤੇ ਜਾਣ ਦੀਆਂ ਗੱਲਾਂ ਵੀ ਸਾਹਮਣੇ ਆਈਆਂ ਹਨ। ਦਾਅਵਾ ਹੈ ਕਿ ਲੜਕੀ ਨੇ ਦਬਾਅ ਦੇ ਬਾਵਜੂਦ ਮਾਮਲਾ ਦਰਜ ਕਰਵਾਉਣ ਅਤੇ ਆਪਣੇ ਬਿਆਨ ਦੇਣ ’ਤੇ ਜ਼ੋਰ ਦਿੱਤਾ।
ਹੁਣ ਇਸ ਮਾਮਲੇ ਦੇ ਮੁੜ ਚਰਚਾ ਵਿੱਚ ਆਉਣ ਨਾਲ ਅੰਮ੍ਰਿਤਸਰ ਪੁਲਿਸ ਦੀ ਭੂਮਿਕਾ ਨੂੰ ਲੈ ਕੇ ਵੀ ਸਵਾਲ ਉੱਠ ਰਹੇ ਹਨ। ਜੇਕਰ ਲੜਕੀ ਦੇ ਪੁਰਾਣੇ ਬਿਆਨ, FIR, ਮੈਜਿਸਟ੍ਰੇਟ ਸਾਹਮਣੇ ਦਰਜ ਬਿਆਨ ਅਤੇ ਅਦਾਲਤੀ ਰਿਕਾਰਡ ਸਾਹਮਣੇ ਆਉਂਦੇ ਹਨ ਤਾਂ ਮਾਮਲੇ ਦੀਆਂ ਕਈ ਅਹਿਮ ਕੜੀਆਂ ਜੋੜੀਆਂ ਜਾ ਸਕਦੀਆਂ ਹਨ।

ਸਿਆਸੀ-ਪੁਲਿਸ ਕਨੈਕਸ਼ਨ ਦੀਆਂ ਚਰਚਾਵਾਂ
ਇਸ ਮਾਮਲੇ ਨਾਲ ਵੱਖ-ਵੱਖ ਸਿਆਸੀ ਆਗੂਆਂ ਅਤੇ ਪੁਲਿਸ ਅਧਿਕਾਰੀਆਂ ਦੇ ਕਥਿਤ ਸਬੰਧਾਂ ਦੀਆਂ ਚਰਚਾਵਾਂ ਵੀ ਜੁੜ ਗਈਆਂ ਹਨ। ਕੁਝ ਸੂਤਰਾਂ ਵੱਲੋਂ ਇੱਕ ਸੀਨੀਅਰ ਕਾਂਗਰਸੀ ਆਗੂ ਸਮੇਤ ਹੋਰ ਸਿਆਸੀ ਅਤੇ ਪੁਲਿਸ ਹਸਤੀਆਂ ਦੇ ਨਾਂ ਲਏ ਜਾ ਰਹੇ ਹਨ। ਇਸ ਤੋਂ ਇਲਾਵਾ ਮੁੱਖ ਮੰਤਰੀ ਭਗਵੰਤ ਮਾਨ ਦੀ ਪਤਨੀ ਗੁਰਪ੍ਰੀਤ ਕੌਰ ਨਾਲ ਜੋੜ ਕੇ ਵੀ ਪੈਸੇ ਦੇ ਲੈਣ-ਦੇਣ ਅਤੇ ਮਾਮਲਾ ਪ੍ਰਭਾਵਿਤ ਕਰਨ ਵਰਗੇ ਗੰਭੀਰ ਦੋਸ਼ ਚਰਚਾ ਵਿੱਚ ਹਨ। ਇਨ੍ਹਾਂ ਦੋਸ਼ਾਂ ਦਾ ਕੋਈ ਅਧਿਕਾਰਤ ਸਬੂਤ ਜਾਂ ਸੁਤੰਤਰ ਪੁਸ਼ਟੀ ਉਪਲਬਧ ਨਹੀਂ ਹੈ। ਇਸ ਲਈ ਇਨ੍ਹਾਂ ਨੂੰ ਸਿਰਫ਼ ਦਾਅਵਿਆਂ ਦੇ ਰੂਪ ਵਿੱਚ ਹੀ ਦੇਖਿਆ ਜਾ ਸਕਦਾ ਹੈ।