ਅਮਰੀਕਾ ‘ਚ ਭਾਰਤੀ ਮੂਲ ਦਾ ਪਰਿਵਾਰ ਸ਼ੱਕੀ ਹਾਲਾਤਾਂ ‘ਚ ਫੌਤ, ਬੰਗਲੇ ‘ਚੋਂ ਮਿਲੀਆਂ ਮਾਂ-ਪਿਓ ਅਤੇ ਧੀ ਦੀਆਂ ਲਾਸ਼ਾਂ

ਡੇਲੀ ਮੇਲ ਦੀ ਰਿਪੋਰਟ ਮੁਤਾਬਕ ਪੁਲਿਸ ਨੇ ਇਸ ਨੂੰ ਆਪਸੀ ਹਿੰਸਾ ਦਾ ਮਾਮਲਾ ਦੱਸਿਆ ਹੈ। ਹਾਲਾਂਕਿ, ਘਰ ਵਿੱਚ ਭੰਨਤੋੜ ਦੇ ਕੋਈ ਨਿਸ਼ਾਨ ਨਹੀਂ ਮਿਲੇ ਹਨ। ਤਿੰਨਾਂ ਦੀ ਮੌਤ ਕਦੋਂ ਅਤੇ ਕਿਸ ਕਾਰਨ ਹੋਈ, ਇਸ ਦੀ ਜਾਂਚ ਕੀਤੀ ਜਾ ਰਹੀ ਹੈ।

ਵੀਰਵਾਰ ਸ਼ਾਮ ਕਰੀਬ ਸਾਢੇ ਸੱਤ ਵਜੇ (ਅਮਰੀਕੀ ਸਮੇਂ) ਕਮਲ ਪਰਿਵਾਰ ਦਾ ਕੋਈ ਰਿਸ਼ਤੇਦਾਰ ਉਨ੍ਹਾਂ ਦੇ ਘਰ ਗਿਆ। ਇਸ ਦੌਰਾਨ ਉਸ ਨੇ ਇੱਕ ਲਾਸ਼ ਦੇਖੀ। ਰਿਸ਼ਤੇਦਾਰ ਨੇ ਪੁਲਸ ਨੂੰ ਸੂਚਨਾ ਦਿੱਤੀ, ਜਿਸ ਤੋਂ ਬਾਅਦ ਉਨ੍ਹਾਂ ਨੂੰ ਘਰ ‘ਚ ਬਾਕੀ ਦੋ ਲਾਸ਼ਾਂ ਮਿਲੀਆਂ।

ਰਾਕੇਸ਼ ਅਤੇ ਟੀਨਾ ਨੇ ਹਾਲ ਹੀ ਵਿੱਚ ਦੀਵਾਲੀਆ ਘੋਸ਼ਿਤ ਕਰਨ ਲਈ ਅਰਜ਼ੀ ਦਿੱਤੀ ਸੀ। ਉਸ ‘ਤੇ 83 ਕਰੋੜ ਰੁਪਏ ਤੱਕ ਦਾ ਕਰਜ਼ਾ ਸੀ। ਉਸ ਦਾ ਬੰਗਲਾ ਵੀ ਨਿਲਾਮ ਹੋਣ ਵਾਲਾ ਸੀ। ਰਿਪੋਰਟ ਮੁਤਾਬਕ ਰਾਕੇਸ਼ ਮੈਸੇਚਿਉਸੇਟਸ ਦੇ ਸਭ ਤੋਂ ਪੌਸ਼ ਇਲਾਕੇ ‘ਚ ਰਹਿੰਦਾ ਸੀ। ਪੁਲਿਸ ਨੂੰ ਰਾਕੇਸ਼ ਦੀ ਲਾਸ਼ ਨੇੜਿਓਂ ਇੱਕ ਬੰਦੂਕ ਵੀ ਮਿਲੀ ਹੈ।

ਕਮਲ ਪਰਿਵਾਰ ਸਾਲ 2022 ਤੋਂ ਆਰਥਿਕ ਸੰਕਟ ਚੱਲ ਰਿਹਾ ਸੀ। ਪਰਿਵਾਰ ਨੇ ਸਤੰਬਰ 2022 ਵਿੱਚ ਦੀਵਾਲੀਆ ਐਲਾਨਣ ਲਈ ਅਰਜ਼ੀ ਦਿੱਤੀ ਸੀ। ਹਾਲਾਂਕਿ, ਇਸ ਸਾਲ ਅਕਤੂਬਰ ਵਿੱਚ, ਸਹੀ ਫਾਰਮ ਅਤੇ ਦਸਤਾਵੇਜ਼ਾਂ ਦੀ ਘਾਟ ਕਾਰਨ ਉਸਦੀ ਅਰਜ਼ੀ ਰੱਦ ਕਰ ਦਿੱਤੀ ਗਈ ਸੀ।

ਕਮਲ ਪਰਿਵਾਰ ਦੇ ਘਰ ਵਿੱਚ ਕਰੀਬ 27 ਕਮਰੇ ਹਨ ਅਤੇ ਇਹ ਡੋਵਰ ਸ਼ਹਿਰ ਦੀ ਇੱਕ ਨਿੱਜੀ ਸੜਕ ‘ਤੇ ਬਣਿਆ ਹੈ। ਟੀਨਾ ਨੇ 2016 ਵਿੱਚ ਆਪਣੀ ਕੰਪਨੀ ਖੋਲ੍ਹੀ, ਜੋ 2021 ਵਿੱਚ ਬੰਦ ਹੋ ਗਈ। ਇਹ ਕੰਪਨੀ ਵਿਦਿਆਰਥੀਆਂ ਦੇ ਗ੍ਰੇਡ ਸੁਧਾਰਨ ਵਿੱਚ ਮਦਦ ਕਰਦੀ ਸੀ।

ਟੀਨਾ ਦੇ ਪਤੀ ਰਾਕੇਸ਼ ਇਸ ਕੰਪਨੀ ਦੇ ਸੀ.ਓ.ਓ. ਸਨ, ਉਸਦੀ ਧੀ ਅਰਿਆਨਾ ਨੇ ਵੀ ਮਿਲਟਨ ਅਕੈਡਮੀ ਵਿੱਚ ਪੜ੍ਹਾਈ ਕੀਤੀ, ਜੋ ਮੈਸੇਚਿਉਸੇਟਸ ਦੇ ਸਭ ਤੋਂ ਮਹਿੰਗੇ ਸਕੂਲਾਂ ਵਿੱਚੋਂ ਇੱਕ ਹੈ। ਉਸਨੇ ਨਿਊਰੋਸਾਇੰਸ ਦੀ ਪੜ੍ਹਾਈ ਕਰਨ ਲਈ ਮਿਡਲਬਰੀ ਕਾਲਜ, ਵਰਮੌਂਟ ਵਿੱਚ ਦਾਖਲਾ ਲਿਆ।

ਮੈਸੇਚਿਉਸੇਟਸ ਪੁਲਿਸ ਨੇ ਦੱਸਿਆ ਕਿ ਡੋਵਰ ਦੇ ਇਸ ਖੇਤਰ ਨੂੰ ਆਮ ਤੌਰ ‘ਤੇ ਸੁਰੱਖਿਅਤ ਸਥਾਨ ਮੰਨਿਆ ਜਾਂਦਾ ਹੈ। ਇੱਥੇ ਹਿੰਸਾ ਦੇ ਬਹੁਤ ਘੱਟ ਮਾਮਲੇ ਦਰਜ ਕੀਤੇ ਗਏ ਹਨ। ਡੋਵਰ ਵਿੱਚ ਕਤਲ ਨਾਲ ਸਬੰਧਤ ਆਖਰੀ ਮਾਮਲਾ 2020 ਵਿੱਚ ਸਾਹਮਣੇ ਆਇਆ ਸੀ। ਉਸ ਵੇਲੇ ਇੱਕ 58 ਸਾਲਾ ਡਾਕਟਰ ਨੇ ਆਪਣੀ ਪਤਨੀ ਕੈਥਲੀਨ ਦਾ ਕਤਲ ਕਰਕੇ ਉਸਦੀ ਲਾਸ਼ ਛੱਪੜ ਵਿੱਚ ਸੁੱਟ ਦਿੱਤੀ ਸੀ।