ਸ੍ਰੀਨਗਰ ‘ਚ ਫੇਰ ਟਾਰਗੇਟ ਕਿਲਿੰਗ, ਅੱਤਵਾਦੀਆਂ ਨੇ ਅੰਮ੍ਰਿਤਸਰ ਦੇ ਦੋਵੇਂ ਨੌਜਵਾਨਾਂ ਨੂੰ ਬਣਾਇਆ ਨਿਸ਼ਾਨਾ

ਅੰਮ੍ਰਿਤਪਾਲ ਸਿੰਘ ਪਿਛਲੇ 4-5 ਸਾਲਾਂ ਤੋਂ ਸ੍ਰੀਨਗਰ ਜਾ ਰਿਹਾ ਸੀ। ਇੱਥੇ ਉਸਨੂੰ 600 ਰੁਪਏ ਦਿਹਾੜੀ ਮਿਲਦੀ ਸੀ ਅਤੇ ਸ੍ਰੀਨਗਰ ਵਿੱਚ ਉਸਨੂੰ 1500 ਰੁਪਏ ਮਿਲਦੇ ਸਨ। ਇਹੀ ਕਾਰਨ ਹੈ ਕਿ ਉਸ ਨੇ ਪੰਜਾਬ ਨਾਲੋਂ ਸ੍ਰੀਨਗਰ ਵਿੱਚ ਰਹਿ ਕੇ ਪੈਸਾ ਕਮਾਉਣਾ ਬਿਹਤਰ ਸਮਝਿਆ। ਉਹ 6 ਤੋਂ 8 ਮਹੀਨੇ ਸ੍ਰੀਨਗਰ ਵਿੱਚ ਰਹਿ ਕੇ ਰੋਜ਼ਗਾਰ ਕਮਾ ਕੇ ਸਰਦੀਆਂ ਤੋਂ ਪਹਿਲਾਂ ਅੰਮ੍ਰਿਤਸਰ ਵਾਪਸ ਆ ਜਾਂਦਾ ਸੀ।

ਅੰਮ੍ਰਿਤਪਾਲ ਅਤੇ ਰੋਹਿਤ ਦੀਆਂ ਲਾਸ਼ਾਂ ਦਾ ਪੋਸਟਮਾਰਟਮ ਕਰਵਾ ਕੇ ਪਰਿਵਾਰ ਨੂੰ ਸੌਂਪ ਦਿੱਤੀਆਂ ਗਈਆਂ ਹਨ। ਦੋਵਾਂ ਦੀਆਂ ਲਾਸ਼ਾਂ ਅੱਜ ਅੰਮ੍ਰਿਤਸਰ ਪਹੁੰਚਣ ਦੀ ਉਮੀਦ ਹੈ।

ਅੰਮ੍ਰਿਤਪਾਲ ਸਿੰਘ ਦੀ ਮਾਤਾ ਰਾਜਵਿੰਦਰ ਕੌਰ ਨੇ ਦੱਸਿਆ ਕਿ ਉਸ ਦੇ ਲੜਕੇ ਅੰਮ੍ਰਿਤਪਾਲ ਸਿੰਘ ਨੂੰ ਗੁਰਦਾਸਪੁਰ ਤੋਂ ਇਕ ਠੇਕੇਦਾਰ ਕੰਮ ਲਈ ਸ੍ਰੀਨਗਰ ਲੈ ਗਿਆ ਸੀ। ਅੰਮ੍ਰਿਤਪਾਲ ਦਾ ਮੰਗਲਵਾਰ ਸਵੇਰੇ ਹੀ ਫੋਨ ਆਇਆ ਸੀ ਅਤੇ ਉਹ ਇਸ ਵਾਰ ਰੋਹਿਤ ਨੂੰ ਆਪਣੇ ਨਾਲ ਲੈ ਗਿਆ ਸੀ। ਉਹ ਡ੍ਰਾਈ ਫਰੂਟਸ ਦੀ ਦੁਕਾਨ ‘ਤੇ ਲੱਕੜ ਦਾ ਕੰਮ ਕਰਦਾ ਸੀ।

ਰੋਹਿਤ ਦੇ ਪਿਤਾ ਪ੍ਰੇਮ ਮਸੀਹ ਨੇ ਦੱਸਿਆ ਕਿ ਅੰਮ੍ਰਿਤਪਾਲ ਦੀਵਾਲੀ ਤੋਂ ਪਹਿਲਾਂ ਸ੍ਰੀਨਗਰ ਤੋਂ ਘਰ ਪਰਤਿਆ ਸੀ। ਅੰਮ੍ਰਿਤਪਾਲ ਨੇ ਰੋਹਿਤ ਨੂੰ ਆਪਣੇ ਫੋਨ ’ਤੇ ਵਾਦੀਆਂ ਦੀਆਂ ਖੂਬਸੂਰਤ ਤਸਵੀਰਾਂ ਦਿਖਾਈਆਂ। ਜਿਸ ਨੂੰ ਦੇਖ ਕੇ ਉਸ ਨੂੰ ਵੀ ਸ੍ਰੀਨਗਰ ਘੁੰਮਣ ਦਾ ਮਨ ਹੋਇਆ। ਅੰਮ੍ਰਿਤਪਾਲ ਨੇ ਪਹਿਲਾਂ ਹੀ ਉਸ ਨੂੰ ਆਪਣੇ ਨਾਲ ਲਿਜਾਣ ਦੀ ਤਿਆਰੀ ਕਰ ਲਈ ਸੀ। ਅੰਮ੍ਰਿਤਪਾਲ ਨੇ ਕਿਹਾ ਕਿ ਅਸੀਂ ਸ਼੍ਰੀਨਗਰ ਜਾਵਾਂਗੇ ਅਤੇ ਇਸ ਦੇ ਨਾਲ ਹੀ ਤਰਖਾਣ ਦਾ ਕੰਮ ਕਰਦੇ ਹੋਏ ਪੈਸੇ ਵੀ ਕਮਾਵਾਂਗੇ।

ਪ੍ਰੇਮ ਮਸੀਹ ਨੇ ਦੱਸਿਆ ਕਿ ਉਸਦਾ ਲੜਕਾ ਰੋਹਿਤ ਅੰਮ੍ਰਿਤਸਰ ਵਿਖੇ ਪੇਂਟ ਦਾ ਕੰਮ ਕਰਦਾ ਸੀ ਅਤੇ ਉਹ ਖੁਦ ਦਿਹਾੜੀਦਾਰ ਮਜ਼ਦੂਰ ਹੈ। ਅੰਮ੍ਰਿਤਪਾਲ ਕਾਰਨ ਉਹ ਉਸ ਦੇ ਨਾਲ ਲੱਕੜ ਦੇ ਕੰਮ ਵਿੱਚ ਸਹਾਇਕ ਵਜੋਂ ਗਿਆ ਸੀ, ਤਾਂ ਜੋ ਉਹ ਸ੍ਰੀਨਗਰ ਦੀ ਸੈਰ ਕਰ ਸਕੇ ਅਤੇ ਪੈਸੇ ਵੀ ਕਮਾ ਸਕੇ। ਰੋਹਿਤ ਦੇ ਦੋ ਭੈਣ-ਭਰਾ ਹਨ। ਸਵੇਰੇ ਰੋਹਿਤ ਦੀ ਮੌਤ ਦੀ ਖਬਰ ਸੁਣ ਕੇ ਪਰਿਵਾਰ ਦੀ ਹਾਲਤ ਖਰਾਬ ਹੋ ਗਈ।

ਅੰਮ੍ਰਿਤਪਾਲ ਦੇ ਪਿਤਾ ਸੁਰਮੁੱਖ ਸਿੰਘ ਨੇ ਦੱਸਿਆ ਕਿ ਉਹ ਤਿੰਨ-ਚਾਰ ਵਾਰ ਸ੍ਰੀਨਗਰ ਜਾ ਚੁੱਕਾ ਹੈ। ਉਸ ਦੇ ਕੁੱਲ 7 ਭੈਣ-ਭਰਾ ਹਨ। ਜਿਨ੍ਹਾਂ ਵਿੱਚੋਂ ਅੰਮ੍ਰਿਤਪਾਲ ਸਭ ਤੋਂ ਛੋਟਾ ਹੈ। ਉਸਦਾ ਭਰਾ ਜਲੰਧਰ ਵਿੱਚ ਕੰਮ ਕਰਦਾ ਹੈ। ਅੰਮ੍ਰਿਤਪਾਲ ਘਰ ਦਾ ਸਭ ਤੋਂ ਪਿਆਰਾ ਸੀ। ਜੇਕਰ ਉਸ ਨੂੰ ਪਤਾ ਹੁੰਦਾ ਕਿ ਉਸ ਨਾਲ ਅਜਿਹਾ ਹੋ ਸਕਦਾ ਹੈ ਤਾਂ ਉਹ ਉਸ ਨੂੰ ਕਦੇ ਵੀ ਸ੍ਰੀਨਗਰ ਨਾ ਜਾਣ ਦਿੰਦੇ। ਇਸ ਤੋਂ ਪਹਿਲਾਂ ਵੀ ਉਹ ਤਿੰਨ ਵਾਰ ਸ੍ਰੀਨਗਰ ਜਾ ਚੁੱਕਾ ਹੈ।

ਅੰਮ੍ਰਿਤਪਾਲ ਅਤੇ ਰੋਹਿਤ ‘ਤੇ ਇਹ ਹਮਲਾ ਸ਼੍ਰੀਨਗਰ ‘ਚ ਇਸ ਸਾਲ ਦੀ ਪਹਿਲੀ ਟਾਰਗੇਟ ਕਿਲਿੰਗ ਹੈ। ਪਿਛਲੇ ਸਾਲ ਸ੍ਰੀਨਗਰ ਵਿੱਚ ਇੱਕ ਦਰਜਨ ਟਾਰਗੇਟ ਕਿਲਿੰਗ ਦੀਆਂ ਘਟਨਾਵਾਂ ਵਾਪਰੀਆਂ ਸਨ। ਜਿਸ ‘ਚ ਅੱਤਵਾਦੀਆਂ ਨੇ ਉਨ੍ਹਾਂ ਪੁਲਸ ਕਰਮਚਾਰੀਆਂ ਨੂੰ ਵੀ ਨਿਸ਼ਾਨਾ ਬਣਾਇਆ ਜੋ ਛੁੱਟੀ ‘ਤੇ ਘਰ ਆਏ ਸਨ। ਇਸ ਦੇ ਨਾਲ ਹੀ 7 ਅਕਤੂਬਰ 2021 ਨੂੰ ਸ੍ਰੀਨਗਰ ਵਿੱਚ ਸਿੱਖ ਅਧਿਆਪਕਾ ਸਪਿੰਦਰ ਕੌਰ ਦਾ ਕਤਲ ਕਰ ਦਿੱਤਾ ਗਿਆ ਸੀ। ਇਹ ਹਮਲਾ ਇਸ ਲਈ ਵੀ ਹੋਇਆ ਕਿਉਂਕਿ ਉਹ ਇੱਕ ਗ਼ੈਰ-ਮੁਸਲਿਮ ਸੀ ਅਤੇ ਸ੍ਰੀਨਗਰ ਵਿੱਚ ਰਹਿ ਕੇ ਰੋਜ਼ੀ-ਰੋਟੀ ਕਮਾ ਰਹੀ ਸੀ।

ਲਸ਼ਕਰ-ਏ-ਤੋਇਬਾ ਤੋਂ ਨਿਕਲੇ ਸੰਗਠਨ ਦ ਰੇਸਿਸਟੈਂਸ ਫੋਰਸ (ਟੀਆਰਐਫ) ਨੇ ਇਸ ਘਟਨਾ ਨੂੰ ਅੰਜਾਮ ਦਿੱਤਾ ਹੈ। ਇਹ ਸੰਗਠਨ ਲੰਬੇ ਸਮੇਂ ਤੋਂ ਸ਼੍ਰੀਨਗਰ ‘ਚ ਗੈਰ-ਮੁਸਲਮਾਨਾਂ ਨੂੰ ਨਿਸ਼ਾਨਾ ਬਣਾ ਰਿਹਾ ਹੈ। ਉਨ੍ਹਾਂ ਦਾ ਨਿਸ਼ਾਨਾ ਸਿਰਫ਼ ਉਹ ਆਮ ਨਾਗਰਿਕ ਹਨ ਜੋ ਗ਼ੈਰ-ਮੁਸਲਿਮ ਹਨ ਅਤੇ ਸ੍ਰੀਨਗਰ ਵਿੱਚ ਆਪਣੀ ਰੋਜ਼ੀ-ਰੋਟੀ ਕਮਾ ਰਹੇ ਹਨ।