ਦਾ ਐਡੀਟਰ, ਹੁਸ਼ਿਆਰਪੁਰ ——– ਮੁਕਤਸਰ ਸੀਆਈਏ ਦਾ ਕਾਂਡ ਅਜੇ ਸੁਰਖੀਆਂ ‘ਚ ਹੀ ਸੀ ਕਿ ਹੁਣ ਹੁਸ਼ਿਆਰਪੁਰ ਪੁਲਿਸ ਨੇ ਇੱਕ ਨਵਾਂ ਚੰਦ ਚਾੜ੍ਹ ਦਿੱਤਾ ਹੈ। ਜਿਸ ‘ਚ ਇੱਕ ਇਟਾਲੀਅਨ ਸਿਟੀਜਨ ਵਿਅਕਤੀ ਨੂੰ ਪੁਲਿਸ ਤਸ਼ੱਦਦ ਦਾ ਸ਼ਿਕਾਰ ਬਣਾਇਆ ਗਿਆ ਹੈ, ਉਸ ਦਾ ਕਸੂਰ ਸਿਰਫ ਇਨ੍ਹਾਂ ਸੀ ਕਿ ਉਹ ਟ੍ਰੈਕਟਰ ਤੇਜ਼ ਚਲਾ ਰਿਹਾ ਸੀ, ਭਾਰਤ ‘ਚ ਇਟਲੀ ਦੀ ਅੰਬੈਸੀ ਨੂੰ ਡੀ ਜੀ ਪੀ ਪੰਜਾਬ ਅਤੇ ਐਸ ਐਸ ਪੀ ਹੁਸ਼ਿਆਰਪੁਰ ਨੂੰ ਭੇਜੀ ਗਈ ਸ਼ਿਕਾਇਤ ਦੇ ਮਾਮਲੇ ‘ਚ ਇਸ ਇਟਾਲੀਅਨ ਸਿਟੀਜਨ ਨੇ ਜਿੱਥੇ ਪੁਲਿਸ ਵੱਲੋਂ ਕਿਡਨੈਪ ਕਰਨ, ਰਾਹ ‘ਚ ਫੇਕ ਐਨਕਾਊਂਟਰ ਕਰਨ ਦੀ ਕੋਸ਼ਿਸ਼, ਸੋਨੇ ਦੀ ਚੇਨ ਅਤੇ ਨੱਤੀਆਂ ਲਾਹੁਣ ਅਤੇ ਬਾਅਦ ‘ਚ ਢਾਈ ਲੱਖ ਰੁਪਏ ਲੈ ਕੇ ਪੁਲਿਸ ਹਿਰਾਸਤ ‘ਚੋਂ ਛੱਡਣ ਦੇ ਗੰਭੀਰ ਇਲਜ਼ਾਮ ਲਾਏ ਹਨ।
ਭੇਜੀ ਗਈ ਸ਼ਿਕਾਇਤ ਦੀ ਕਾਪੀ ‘ਦਾ ਐਡੀਟਰ’ ਕੋਲ ਮੌਜੂਦ ਹੈ, ਜਿਸ ‘ਚ ਨਵਜੋਤ ਸਿੰਘ ਕਲੇਰ ਪੁੱਤਰ ਮਨਜੀਤ ਸਿੰਘ ਕਲੇਰ ਜੋ ਕਿ ਇਟਲੀ ਦੇ ਮਿਲਾਨ ‘ਚ ਰਹਿ ਰਿਹਾ ਹੈ ਨੇ ਦੱਸਿਆ ਕਿ ਉਹ ਕਰੀਬ ਡੇਢ ਸਾਲ ਤੋਂ ਆਪਣੇ ਨਜਦੀਕੀ ਰਿਸ਼ਤੇਦਾਰ ਕੋਲ ਪਿੰਡ ਮੇਗੋਵਾਲ ਗੰਜੀਆਂ ‘ਚ ਰਹਿ ਰਿਹਾ ਸੀ। ਨਵਜੋਤ ਸਿੰਘ ਨੇ ਦੱਸਿਆ ਕਿ 28 ਸਤੰਬਰ 2023 ਨੂੰ ਜਦ ਉਹ ਖੇਤਾਂ ‘ਚ ਕੰਮ ਕਰ ਰਿਹਾ ਤਾਂ ਉਸ ਨੂੰ ਰਿਸ਼ਤੇਦਾਰ ਪ੍ਰਿਤਪਾਲ ਸਿੰਘ ਦਾ ਕਰੀਬ 7:45 ‘ਤੇ ਫੋਨ ਆਇਆ ਕਿ ਸਾਡੇ ਪਿੰਡ ਦੇ ਸਾਬਕਾ ਸਰਪੰਚ ਸੁਰਜੀਤ ਸਿੰਘ ਅਣਖੀ ਨੂੰ ਪਿੰਡ ‘ਚ ਕਿਸੇ ਨੇ ਗੋਲੀਆਂ ਮਾਰ ਦਿੱਤੀਆਂ ਹਨ ਤੂੰ ਜਲਦੀ ਘਰ ਪਹੁੰਚ ਤਾਂ ਜੋ ਅਣਖੀ ਨੂੰ ਜਿਸ ਹਸਪਤਾਲ ਲੈ ਕੇ ਗਏ ਨੇ ਉਸ ਲਈ ਪਿੱਛੇ ਪੈਸੇ ਲੈ ਕੇ ਜਾਣਾ ਹੈ।
ਕਿਉਂਕਿ ਉਨ੍ਹਾਂ ਦੇ ਪਰਿਵਾਰ ਦੇ ਸਰਪੰਚ ਸੁਰਜੀਤ ਸਿੰਘ ਅਣਖੀ ਨਾਲ ਬਹੁਤ ਘਰੇਲੂ ਸੰਬੰਧ ਸਨ ਤਾਂ ਉਹ ਗੋਲੀ ਦੀ ਗੱਲ ਸੁਣ ਕੇ ਤੇਜ਼ੀ ਨਾਲ ਟਰੈਕਟਰ ‘ਤੇ ਘਰ ਨੂੰ ਆ ਰਿਹਾ ਸੀ ਤਾਂ ਪਿੰਡ ਦੇ ਚੌਂਕ ‘ਚ ਜਿੱਥੇ ਇਹ ਘਟਨਾ ਵਾਪਰੀ ਸੀ, ਉਸ ਘਟਨਾ ਵਾਲੇ ਸਥਾਨ ‘ਤੇ ਪਹੁੰਚਿਆ ਤਾਂ ਪਤਾ ਲੱਗਾ ਕਿ ਉਸ ਨੂੰ ਹੁਸ਼ਿਆਰਪੁਰ ਲੈ ਗਏ ਹਨ ਤਾਂ ਮੈਂ ਟਰੈਕਟਰ ਤੇਜ਼ ਭਜਾ ਕੇ ਪੈਸੇ ਲੈਣ ਲਈ ਘਰ ਪੁੱਜਾ ਤਾਂ ਅਜੇ ਇੱਕ ਮਿੰਟ ਹੀ ਹੋਇਆ ਸੀ ਤਾਂ ਐਨੇ ਨੂੰ ਥਾਣਾ ਬੁੱਲੋਵਾਲ ਅਧੀਨ ਪੈਂਦੀ ਨਾਸਰਾਲਾ ਚੌਂਕੀ ਇੰਚਾਰਜ ਮਨਜਿੰਦਰ ਸਿੰਘ ਤੇ ਉਸ ਦੇ ਸਾਥੀ ਪੁਲਿਸ ਵਾਲੇ ਦੋ ਗੱਡੀਆਂ ‘ਤੇ ਆ ਗਏ ਅਤੇ ਘਰੋਂ ਹੀ ਸਾਰੇ ਪਿੰਡ ਦੇ ਸਾਹਮਣੇ ਕੁੱਟਮਾਰ ਕਰਦੇ ਹੋਏ ਉਸ ਨੂੰ ਉਸ ਚੌਂਕ ਤੱਕ ਲੈ ਗਏ ਜਿੱਥੇ ਸਾਬਕਾ ਸਰਪੰਚ ਸੁਰਜੀਤ ਸਿੰਘ ਅਣਖੀ ਦੇ ਗੋਲੀਆਂ ਮਾਰੀਆਂ ਗਈਆਂ ਸੀ। ਉਸ ਤੋਂ ਬਾਅਦ ਮੈਨੂੰ ਗੱਡੀ ‘ਚ ਸੁੱਟ ਕੇ ਪਿੰਡ ਦੇ ਬਾਹਰ-ਬਾਹਰ ਪੈਂਦੇ ਪਿੰਡ ਗੁਰਦੁਵਾਰਾ ਸਤਿ ਸਾਹਿਬ ਦੇ ਕੋਲ ਪੁੱਜੇ ਤਾਂ ਮੈਨੂੰ ਚੌਂਕੀ ਇੰਚਾਰਜ ਮਨਜਿੰਦਰ ਸਿੰਘ ਨੇ ਥੱਲੇ ਉਤਾਰ ਲਿਆ ਅਤੇ ਮੇਰੇ ਮੂੰਹ ‘ਚ ਆਪਣਾ ਪਿਸਤੌਲ ਦੇ ਦਿੱਤਾ ਅਤੇ ਮੈਨੂੰ ਕਹਿਣ ਲੱਗਾ ਕਿ ਤੂੰ ਭੱਜ ਜਾਂ 10 ਲੱਖ ਰੁਪਇਆ ਦੇ, ਐਨੇ ਨੂੰ ਪਿੱਛੇ ਨੂੰ ਮੇਰੇ ਪਿੰਡ ਦਾ ਵਿਅਕਤੀ ਬਲਜਿੰਦਰ ਸਿੰਘ ਆ ਗਿਆ ਅਤੇ ਉਸ ਨੂੰ ਦੇਖ ਕੇ ਮੈਨੂੰ ਫੇਰ ਦੁਬਾਰਾ ਗੱਡੀ ‘ਚ ਸੁੱਟ ਕੇ ਚੌਂਕੀ ‘ਚ ਲੈ ਗਏ ਅਤੇ ਚੌਂਕੀ ‘ਚ ਲਿਜਾ ਕੇ ਕਈ ਪੁਲਿਸ ਮੁਲਾਜ਼ਮਾਂ ਵੱਲੋਂ ਡੰਡਿਆਂ, ਚੱਪਲਾਂ ਅਤੇ ਰਫਲ ਦੀਆਂ ਵੱਟਾਂ ਨਾਲ ਮਾਰਿਆ ਗਿਆ।
ਢਾਈ ਲੱਖ ਦੇ ਕੇ ਛੁਡਾਇਆ ਖਹਿੜਾ
ਇਸ ਸੰਬੰਧੀ ਜਿਹੜੀ ਸ਼ਿਕਾਇਤ ਕੀਤੀ ਗਈ ਹੈ ਉਸ ‘ਚ ਇਸ ਗੱਲ ਦਾ ਖੁਲਾਸਾ ਕੀਤਾ ਗਿਆ ਹੈ ਕਿ ਇਸ ਸਾਰੇ ਘਟਨਾਕ੍ਰਮ ਦੇ ਪਿੱਛੇ ਡੀ ਐਸ ਪੀ ਆਰ ਤਲਵਿੰਦਰ ਕੁਮਾਰ ਦਾ ਹੱਥ ਹੈ ਅਤੇ ਇਸ ਸੰਬੰਧੀ ਸਾਰੀ ਜਾਣਕਾਰੀ ਫੋਨ ‘ਤੇ ਡੀ ਐਸ ਪੀ ਆਰ ਤਲਵਿੰਦਰ ਕੁਮਾਰ ਨੂੰ ਦਿੱਤੀ ਜਾ ਰਹੀ ਸੀ ਅਤੇ ਬਾਅਦ ‘ਚ ਢਾਈ ਲੱਖ ਰੁਪਇਆ ਪਿੰਡ ਦੇ ਹੀ ਪ੍ਰਿਤਪਾਲ ਸਿੰਘ ਵੱਲੋਂ ਪੁਲਿਸ ਨੂੰ ਦੇਣ ਤੋਂ ਬਾਅਦ ਨਵਜੋਤ ਸਿੰਘ ਨੂੰ ਛੱਡ ਦਿੱਤਾ ਗਿਆ।
ਮੈਡੀਕਲ ‘ਚ ਹੋਇਆ ਖੁਲਾਸਾ
ਜਦੋਂ ਨਵਜੋਤ ਸਿੰਘ ਨੂੰ ਛੱਡਿਆ ਗਿਆ ਤਾਂ ਤੁਰੰਤ ਉਸ ਨੂੰ ਸਿਵਲ ਹਸਪਤਾਲ ਹੁਸ਼ਿਆਰਪੁਰ ਲਿਆਂਦਾ ਗਿਆ, ਜਿੱਥੇ ਨਵਜੋਤ ਦਾ ਮੈਡੀਕਲ ਕਰਵਾਇਆ ਗਿਆ ਤਾਂ ਜਿਥੇ ਮੈਡੀਕਲ ਦੇ ਵਿਚ ਦੀ ਪੁਸ਼ਟੀ ਹੋ ਗਈ ਕਿ ਜਿਥੇ ਉਸ ਨੂੰ ਕੁੱਟਿਆ ਮਾਰਿਆ ਗਿਆ ਹੈ, ਉਥੇ ਹੀ ਮੈਡੀਕਲ ‘ਚ ਕੁਝ ਸੱਟਾਂ ਰਫਲ ਦੇ ਵੱਟਾਂ ਦੀਆਂ ਵੀ ਸਾਹਮਣੇ ਆ ਗਈਆਂ। ਮੌਕੇ ‘ਤੇ ਜਿਹੜੀਆਂ ਵੀਡੀਓਜ਼ ਬਣਾਈਆਂ ਗਈਆਂ ਉਸ ‘ਚ ਵੀ ਇਹ ਗੱਲ ਸਾਫ ਝਲਕ ਰਹੀ ਹੈ ਕਿ ਪੁਲਿਸ ਵੱਲੋਂ ਗਲੇ ‘ਚੋਂ ਖਿੱਚ ਕੇ ਲਾਹੀ ਗਈ ਸੋਨੇ ਦੀ ਚੈਨੀ ਦੇ ਨਿਸ਼ਾਨ ਵੀ ਸਾਫ ਦਿਸ ਰਹੇ ਸਨ।
ਸੀਸੀਟੀਵੀ ‘ਚ ਕੈਦ ਹੋਈ ਘਟਨਾ
ਜਦ ਨਵਜੋਤ ਸਿੰਘ ਟ੍ਰੈਕਟਰ ‘ਤੇ ਘਰ ਪਹੁੰਚਦਾ ਹੈ ਤਾਂ ਘਰ ‘ਚ ਲੱਗੇ ਸੀਸੀਟੀਵੀ ਕੈਮਰਿਆਂ ਦੀ ਜਿਹੜੀ ਫੁਟੇਜ ਸਾਹਮਣੇ ਆਈ ਹੈ ਉਸ ‘ਚ ਇਹ ਗੱਲ ਸਾਫ ਦਿਸ ਰਹੀ ਹੈ ਕਿ ਪੁਲਿਸ ਨਵਜੋਤ ਸਿੰਘ ਨੂੰ ਘਰ ਤੋਂ ਕੁੱਟਦਿਆਂ ਲੈ ਕੇ ਜਾ ਰਹੀ ਹੈ ਅਤੇ ਕਈ ਪੁਲਿਸ ਮੁਲਾਜ਼ਮ ਉਸ ਦੀ ਲਗਾਤਾਰ ਕੁੱਟਮਾਰ ਕਰ ਰਹੇ ਹਨ।
ਪੁਲਿਸ ਨੇ ਸਿਰੇ ਤੋਂ ਨਾਕਾਰਿਆਂ ਦੋਸ਼ਾਂ ਨੂੰ
ਇਸ ਸੰਬੰਧੀ ਜਦੋਂ ਨਸਰਲਾ ਚੌਂਕੀ ਦੇ ਇੰਚਾਰਜ ਮਨਜਿੰਦਰ ਨਾਲ ਗੱਲ ਕੀਤੀ ਗਈ ਤਾਂ ਉਨ੍ਹਾਂ ਨੇ ਕਿਹਾ ਕਿ ਉਸ ਦਿਨ ਪਿੰਡ ‘ਚ ਗੋਲੀ ਚੱਲੀ ਸੀ ਤਾਂ ਪੁਲਿਸ ਮਾਮਲੇ ਦੀ ਜਾਂਚ ਕਰ ਰਹੀ ਸੀ ਤਾਂ ਇਹ ਵਿਅਕਤੀ ਬੜੀ ਤੇਜ਼ ਰਫਤਾਰ ਨਾਲ ਟ੍ਰੈਕਟਰ ਚਲਾ ਰਿਹਾ ਸੀ ਅਤੇ ਇਸ ਨੇ ਪੁਲਿਸ ਦੀ ਗੱਡੀ ਨੂੰ ਵੀ ਟ੍ਰੈਕਟਰ ਨਾਲ ਟੱਕਰ ਮਾਰੀ ਸੀ, ਲੇਕਿਨ ਕੁੱਟਮਾਰ ਕਿਉਂ ਕੀਤੀ ਗਈ ਇਸ ਦਾ ਜਵਾਬ ਸਪੱਸ਼ਟ ਨਹੀਂ ਦੇ ਸਕੇ।
