ਦਾ ਐਡੀਟਰ ਨਿਊਜ਼, ਪੱਛਮੀ ਬੰਗਾਲ —– ਪੱਛਮੀ ਬੰਗਾਲ ਦੀ ਮੁੱਖ ਮੰਤਰੀ ਮਮਤਾ ਬੈਨਰਜੀ ਨੇ ਵੀਰਵਾਰ ਨੂੰ ਸਪੈਸ਼ਲ ਇੰਟੈਂਸਿਵ ਰਿਵੀਜ਼ਨ (SIR) ਫਾਰਮ ਸਵੀਕਾਰ ਕਰਨ ਦੇ ਦਾਅਵਿਆਂ ਤੋਂ ਇਨਕਾਰ ਕਰ ਦਿੱਤਾ। ਉਨ੍ਹਾਂ ਕਿਹਾ ਕਿ ਉਹ ਅਜਿਹਾ ਉਦੋਂ ਤੱਕ ਨਹੀਂ ਕਰੇਗੀ ਜਦੋਂ ਤੱਕ ਬੰਗਾਲ ਦਾ ਹਰ ਵਿਅਕਤੀ ਉਨ੍ਹਾਂ ਨੂੰ ਨਹੀਂ ਭਰਦਾ।
ਤ੍ਰਿਣਮੂਲ ਕਾਂਗਰਸ ਦੇ ਮੁੱਖ ਪੱਤਰ ਜਾਗੋ ਬੰਗਲਾ ਅਤੇ ਹੋਰ ਮੀਡੀਆ ਆਉਟਲੈਟਾਂ ਨੇ ਦਾਅਵਾ ਕੀਤਾ ਸੀ ਕਿ ਮਮਤਾ ਨੇ ਸਥਾਨਕ ਬੂਥ-ਪੱਧਰੀ ਅਧਿਕਾਰੀ (BLO) ਤੋਂ ਨਿੱਜੀ ਤੌਰ ‘ਤੇ SIR ਫਾਰਮ ਇਕੱਠੇ ਕੀਤੇ ਸਨ। ਜਿਸ ਤੋਂ ਬਾਅਦ ਮੁੱਖ ਮੰਤਰੀ ਨੇ ਫੇਸਬੁੱਕ ‘ਤੇ ਲਿਖਿਆ: BLO ਬੁੱਧਵਾਰ ਨੂੰ ਸਾਡੇ ਕਾਲੀਘਾਟ ਖੇਤਰ ਵਿੱਚ ਆਇਆ ਅਤੇ ਕੁਝ ਲੋਕਾਂ ਨੂੰ SIR ਫਾਰਮ ਵੰਡੇ। ਉਹ ਮੇਰੇ ਘਰ ਵਿੱਚ ਮੇਰੇ ਦਫ਼ਤਰ ਵੀ ਆਏ। ਉਨ੍ਹਾਂ ਨੇ ਅਹਾਤੇ ਵਿੱਚ ਵੋਟਰਾਂ ਦੀ ਗਿਣਤੀ ਬਾਰੇ ਪੁੱਛਗਿੱਛ ਕੀਤੀ ਅਤੇ ਫਾਰਮ ਵੰਡੇ।
ਉਨ੍ਹਾਂ ਨੇਅੱਗੇ ਪੋਸਟ ਵਿੱਚ ਲਿਖਿਆ: “ਕਈ ਮੀਡੀਆ ਆਉਟਲੈਟਾਂ ਨੇ ਰਿਪੋਰਟ ਦਿੱਤੀ ਕਿ ਮੈਂ ਆਪਣੇ ਘਰੋਂ ਬਾਹਰ ਆਈ ਅਤੇ BLO ਤੋਂ ਨਿੱਜੀ ਤੌਰ ‘ਤੇ SIR ਫਾਰਮ ਇਕੱਠੇ ਕੀਤੇ।” ਇਹ ਖ਼ਬਰ ਪੂਰੀ ਤਰ੍ਹਾਂ ਝੂਠੀ, ਗੁੰਮਰਾਹਕੁੰਨ ਅਤੇ ਜਾਣਬੁੱਝ ਕੇ ਪ੍ਰਚਾਰੀ ਜਾ ਰਹੀ ਹੈ ਹੈ। ਮੈਂ ਕੋਈ ਫਾਰਮ ਨਹੀਂ ਭਰਿਆ ਹੈ। ਜਦੋਂ ਤੱਕ ਹਰ ਬੰਗਾਲੀ ਫਾਰਮ ਨਹੀਂ ਭਰਦਾ, ਮੈਂ ਵੀ ਫਾਰਮ ਨਹੀਂ ਭਰਾਂਗੀ।
ਮਮਤਾ ਬੈਨਰਜੀ ਪੱਛਮੀ ਬੰਗਾਲ ਅਤੇ 11 ਹੋਰ ਰਾਜਾਂ ਵਿੱਚ ਚੱਲ ਰਹੀ SIR ਪ੍ਰਕਿਰਿਆ ਦਾ ਵਿਰੋਧ ਕਰ ਰਹੀ ਹੈ। ਉਨ੍ਹਾਂ ਨੇ 4 ਨਵੰਬਰ ਨੂੰ SIR ਦੇ ਖਿਲਾਫ ਕੋਲਕਾਤਾ ਵਿੱਚ ਇੱਕ ਵਿਰੋਧ ਮਾਰਚ ਵੀ ਕੀਤਾ। ਪਾਰਟੀ ਦੇ ਜਨਰਲ ਸਕੱਤਰ ਅਭਿਸ਼ੇਕ ਬੈਨਰਜੀ ਅਤੇ ਵੱਡੀ ਗਿਣਤੀ ਵਿੱਚ ਪਾਰਟੀ ਵਰਕਰ ਰੈਲੀ ਵਿੱਚ ਮੌਜੂਦ ਸਨ।
ਮੁੱਖ ਮੰਤਰੀ ਨੇ ਕਿਹਾ ਕਿ ਜੇਕਰ ਵੋਟਰ ਸੂਚੀ ਗਲਤ ਹੈ, ਤਾਂ ਭਾਜਪਾ ਦੀ ਅਗਵਾਈ ਵਾਲੀ ਕੇਂਦਰ ਸਰਕਾਰ ਵੀ ਗਲਤ ਹੈ। 2026 ਦੀਆਂ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਵੋਟਰ ਸੂਚੀ ਵਿੱਚ ਚੁੱਪ-ਚਾਪ ਹੇਰਾਫੇਰੀ ਕਰਨ ਲਈ SIR ਨੂੰ ਇੱਕ ਰਾਜਨੀਤਿਕ ਹਥਿਆਰ ਵਜੋਂ ਵਰਤਿਆ ਜਾ ਰਿਹਾ ਹੈ। ਜਿਸ ਤਰ੍ਹਾਂ ਹਰ ਉਰਦੂ ਬੋਲਣ ਵਾਲਾ ਪਾਕਿਸਤਾਨੀ ਨਹੀਂ ਹੈ, ਉਸੇ ਤਰ੍ਹਾਂ ਹਰ ਬੰਗਾਲੀ ਬੋਲਣ ਵਾਲਾ ਬੰਗਲਾਦੇਸ਼ੀ ਨਹੀਂ ਹੈ।